Scéim Infheistíochta Oidhreachta Tógtha 2026
An Scéim Infheistíochta Oidhreachta Tógtha 2026
Tá Comhairle Contae Shligigh ag lorg iarratais faoin Scéim Infheistíochta Oidhreachta Tógtha 2026 atá á hoibriú ag an Roinn Tithíochta, Rialtais Áitiúil agus Oidhreachta. Beidh an scéim deontas ar fáil do dhéanmhais laistigh de limistéar Chomhairle Contae Shligigh agus is í Comhairle Contae Shligigh a riarfaidh í.
Seimineár Gréasáin Faisnéise - An Scéim Infheistíochta Oidhreachta Tógtha 2026
Beidh seimineár gréasáin faisnéise ar an Scéim Infheistíochta san Oidhreacht Thógtha 2026 á reáchtáil ag an Oifig Oidhreachta, Comhairle Contae Shligigh, ar an Déardaoin 14 Lúnasa 2025 ag 12 meán lae. Chun clárú, seol ríomhphost chuig conservation@sligococo.ie
An Scéim Infheistíochta Oidhreachta Tógtha agus an Sruth um Fhoirgnimh Ceann Tuí Stairiúla de chuid na Scéime Infheistíochta Oidhreachta Tógtha
Tá sé de rún ag an Scéim Infheistíochta Oidhreachta Tógtha tacú le foirgnimh stairiúla agus déanmhais stairiúla a dteastaíonn deisiú agus caomhantas uathu. Leis an scéim, tacaítear le deisiúcháin riachtanacha agus le hoibreacha caipitil níos lú le haghaidh déanmhais oidhreachta a athchóiriú agus a chaomhnú agus le gairmithe caomhantais, saoir agus ceardaithe a fhostú.
Dámhfar deontais ar fiú idir €2,500 agus €50,000 iad agus ceanglófar ar iarratasóirí 20% ar a laghad de na costais iomlána a íoc.
Beidh scéim micridheontas do ghnáthchothabháil agus do mhiondeisiúcháin ar fáil faoin Scéim Infheistíochta Oidhreachta Tógtha 2026 freisin. Is é €2,500 a bheidh sa dámhachtain uasta do thionscadail den sórt sin.
Is mar a leanas atá Sruthanna Cistiúcháin na Scéime Infheistíochta Oidhreachta Tógtha 2026:
| Sruth Cistiúcháin | Cistiú atá ar Fáil | Deontas Uasta |
|---|---|---|
| An Scéim Infheistíochta Oidhreachta Tógtha | €2,500 - €50,000 | Uasta: 80% de chostas iomlán na n-oibreacha |
| Déanmhais Dhúchasacha (I gcás NACH bhFUIL an déanmhas ina dhéanmhas cosanta ná ina dhéanmhas i Limistéar Caomhantais Ailtireachta) |
€2,500 - €30,000 | Uasta: 80% de chostas iomlán na n-oibreacha |
| An Scéim Micridheontas (Gnáthchothabháil agus miondeisiúcháin) |
Suas le €2,500 | Uasta: 80% de chostas iomlán na n-oibreacha |
| Foirgnimh Ceann Tuí Stairiúla (Aon déanmhas ceann tuí stairiúil, lena n-áirítear réadmhaoine baile agus réadmhaoine tráchtála) |
Suas le €20,000 | Uasta: 80% de chostas iomlán na n-oibreacha |
I gcás scéim deontas na Scéime Infheistíochta Oidhreachta Tógtha, áirítear iad seo a leanas leis na déanmhais atá incháilithe:
- Déanmhais Chosanta: Déanmhais atá ar áireamh sa Taifead ar Dhéanmhais Chosanta i ngach limistéar Údaráis Áitiúil.
- Déanmhais Chosanta Bheartaithe: Déanmhais a bheartaítear a chur ar áireamh sa Taifead ar Dhéanmhais Chosanta ach nár ceadaíodh go foirmiúil go fóill. Ní mór déanmhais den sórt sin a chur leis an Taifead ar Dhéanmhais Chosanta faoin 31 Nollaig 2026.
- Déanmhais i Limistéir Chaomhantais Ailtireachta: i gcás gur féidir a léiriú go gcuirfidh na hoibreacha feabhas ar charachtar an Limistéir Caomhantais Ailtireachta agus ar an gcuma atá air.
- Déanmhais Dhúchasacha
- Aghaidheanna Siopa Stairiúla
- Foirgnimh Ceann Tuí Stairiúla
Tá mionsonraí iomlána faoi na scéimeanna deontas agus foirmeacha iarratais ar fáil lena n-íoslódáil ag www.sligococo.ie/grants. Ba cheart d’iarratasóirí treoirlínte na scéime a léamh agus a bheith eolach ar an scéim deontas iomchuí.
An Scéim Infheistíochta Oidhreachta Tógtha 2026
An Sruth um Fhoirgnimh Ceann Tuí Stairiúla de chuid na Scéime Infheistíochta Oidhreachta Tógtha 2026
Tabhair faoi deara nach mór ráiteas modha arna ullmhú ag gairmí caomhantais atá cáilithe go cuí a bheith ag gabháil le gach iarratas faoin dá scéim deontas.
Ní mór An Scéim Infheistíochta Oidhreachta Tógtha 2026 a bheith marcáilte go soiléir ar iarratais a sheoltar isteach le ríomhphost (rud a spreagtar), agus ní mór iad a sheoladh le ríomhphost chuig conservation@sligococo.ie.
Mar mhalairt air sin, is féidir iarratais chruachóipe a sheoladh chuig: An Scéim Infheistíochta Oidhreachta Tógtha 2026, An Oifig Oidhreachta, Comhairle Contae Shligigh, Halla na Cathrach, Sráid na Cé, Sligeach, F91 PP44.
Is é an t-am deiridh ar a nglacfar le hiarratais chomhlánaithe ná 4pm Dé hAoine an 26 Meán Fómhair 2025.
Ní ghlacfar le hiarratais atá déanach agus/nó neamhiomlán.
Le haghaidh tuilleadh faisnéise, déan teagmháil le: An Oifig Oidhreachta, Comhairle Chontae Shligigh:
Teil.: 071-9114446; ríomhphost: conservation@sligococo.ie